മരണമൊഴി.

കുടിനീരിനായ് പോയ നിസ്വനാം കാറ്റിന്റെ-
യൊടുവിലെസ്സന്ദേശമിന്നുകിട്ടി
അവസാനവൃക്ഷത്തിന്നവസാനപത്രത്തി-
ലറിയാത്ത ലിപിയുള്ള യാത്രാമൊഴി.
‘ഈ കത്തു കിട്ടുമ്പൊഴുണ്ടാവുകില്ല ഞാ-
നീമണ്ണി’ലെന്നറിയിച്ചതാകാം.
‘പുതിയൊരു കാറ്റിനെക്കൈ പിടിച്ചാനയി-
ച്ചതിനെ നിൻ മാരനാ‍യ് മാറ്റു’കെന്നാം.
‘കാലങ്ങൾ നിങ്ങളെപ്പൊന്നുപോൽ ഞാൻ പരി-
പാലിച്ചതോർ’ക്കെന്നു ചൊന്നതാകാം
‘അറിയേണമിനിവരും കാറ്റിനെ’യെന്നവൻ
നിറമിഴിയോടെ കുറിച്ചതാകാം.
28.04.2016